Colloquia Familiaria - Colloquium Vīcēsimum Prīmum

Vēnātiō

Persōnae:
Paulus, Thomas, Vincentius, Laurentius, Bartholus
Paulus
Trahit sua quemque voluptās;(1) mihi placet vēnātiō.
Thomas
Placet et mihi: sed ubi canēs, ubi vēnābula, ubi cassēs?
Paulus
Valeant aprī, ursī, cervī et vulpēs; nōs īnsidiābimur cūnīculīs.
Vincentius
At ego laqueōs iniciām locūstīs. Īnsidiābor gryllīs.
Laurentius
Ego rānās captābō.
Bartholus
Ego pāpiliōnēs vēnābor.
Laurentius
Difficile(2) est sectārī volantia.
Bartholus
Difficile, sed pulchrum; nisi pulchrius esse dūcis sectārī lumbricōs aut cochleās, quia carent ālīs.
Laurentius
Equidem malō īnsidiārī piscibus; est mihi hāmus ēlegāns.
Bartholus
Sed unde parābis ēscam?
Laurentius
Lumbricōrum ubīque māgna est cōpia.
Bartholus
Est, sī tibi velint prōrēpere ē terrā.
Laurentius
At ego mox efficiam, ut multae myriadēs prōsiliant.
Bartholus
Quō pactō? incantāmentīs?
Laurentius
Vidēbis artem.(3) Implē hanc situlam aquā. Hōs iuglandium summōs corticēs vīrentēs cōnfrāctōs immittitō. Hāc aquā perfunde solum. Nunc observā paulisper. Vidēs ēmergentēs?
Bartholus
Rem prōdigiōsam videō. Sīc ōlim,(4) opīnor, exsiliēbant armātī ex satis serpentis dentibus. Sed plērīque piscēs dēlicātiōris et ēlegāntiōris sunt palātī, quam ut ēscā tam vulgārī capiantur.
Laurentius
Nōvī quoddam īnsectī genus, quō tālibus īnsidiārī soleō.
Bartholus
Tū vidē, an possīs impōnere piscibus; ego rānīs facessam negōtium.
Laurentius
Quōmodō? rētī?
Bartholus
Nōn; sed arcū.
Laurentius
Novum pīscandī genus.
Bartholus
At nōn iniūcundum. Vidēbis et fatēberis.
Vincentius
Quid sī(5) nōs duo micēmus digitīs?
Paulus
Ignāvum est ac rūsticum lūsūs genus. Ad focum dēsidentibus magis convenit, quam in campō versantibus.
Vincentius
Quid sī certēmus nucibus?
Paulus
Nucēs admodum puerīs relinquāmus; nōs grandiusculī sumus.
Vincentius
Et tamen nihil aliud adhūc, quam puerī sumus.
Paulus
Sed quibus decōrum est lūdere nucibus, iīsdem nōn indecōrum est equitāre in arundine longā.
Vincentius
Tū igitur praescrībītō lūsūs genus, sequar quōcumque vocāris.
Laurentius
Et ego futūrus sum omnium hōrārum homō.
(1). Trahit sua: hemistich from Virgil's Eclogues.
(2). Difficile sed pulchrum: allusion to the proverb "Difficult things are beautiful."
(3). Artem: the art of fishing serves.
(4). Sīc ōlim: illustration from example.
(5). Quid sī: see Cicero, De Divinatione, book 2.
⟵ Previous Next ⟶