Colloquia Familiaria - Percontandi Forma
Alia (Mauritius et Cypriānus)
Persōnae:
Mauritius, Cyprianus
Mauritius, Cyprianus
Mauritius
Rediistī nōbīs obēsior solitō. Rediistī prōcērior.
Cyprianus
At equidem māllem prūdentior, aut doctior.
Mauritius
Imberbis abierās, rediistī barbātulus. Contrāxistī tibi absēns nōnnihil seniī. Quid sibi vult hic pallor? quid maciēs? quid frōns cāperāta?(1)
Cyprianus
Ut est fortūna, sīc est corporis habitus.
Mauritius
Num adversa?
Cyprianus
Numquam mihi quidem aliās secunda; sed numquam, quam nunc, reflāvit(2) odiōsius.
Mauritius
Doleō vicem tuam. Dolet mihi tua calamitās. Sed quid isthuc malī est?
Cyprianus
Ūniversae pecūniae naufragium(3) fēcī.
Mauritius
In marī?
Cyprianus
Nōn, sed in litore, nōndum nāvem ingressus.
Mauritius
Ubīnam?
Cyprianus
In litore Britannicō.
Mauritius
Bene habet, quod ipse nōbīs vīvus ēnātāstī. Praestat pecūniae iāctūram facere, quam vītae. Lēvius est pecūniae dispendium, quam fāmae.
Cyprianus
Vītā fāmāque incolumī, periit pecūnia.
Mauritius
Vīta sarcīrī(3) nūllō pactō potest, fāma aegrē potest, pecūnia facile alicunde sarciētur. Quī malum hoc accidit?
Cyprianus
Nesciō, nisi quod sīc erat in fātīs meīs. Sīc vīsum est superīs. Sīc libuit geniō meō malō.
Mauritius
Vidēs igitur, doctrīnam ac virtūtem tūtissimās esse dīvitiās, quae nec ēripī possunt, nec gravant circumferentem.
Cyprianus
Pulchrē tū quidem philosophāris, sed interim ego ringor.(4)
(1). Reflāvit: metaphora ab adversīs ventīs.
(2). Naufragium fēcī: id est iactūram fēcī. Allēgoria ā nāvigātōribus dēsūmpta.
(3). Sarcīrī: metaphora [ā sarciendō].
(4). Ringor: discrucior animō.