Colloquia Familiaria - Percontandi Forma
Alia (Dē valētūdine)
Persōnae:
Georgius, Livinus
Georgius, Livinus
Georgius
Valēsne?
Livinus
Contemplāre vultum.
Georgius
Quīn potius lōtium iubēs? An mē putās medicum? Nōn rogō, quid valeās; nam faciēs ipsa loquitur, tē bellē valēre: sed quōmodō tibi placeās.
Livinus
Corpus quidem bellē habet, sed animō male est.
Georgius
At nōn valet, quī isthāc parte labōrat.
Livinus
Sīc rēs habent meae: corpus valet, sed aegrōtat crumena.
Georgius
Facile istī morbō medēbitur māter. Ut valuistī ūsque?
Livinus
Variē, ut sunt rēs mortālium.
Georgius
Satin' rēctē valēs? Salvāne rēs? Satin' salvae rēs? Fuistīne semper prosperā valētūdine?
Livinus
Prosperrimā, grātia superīs. Ego Deī beneficiō perpetuō bellissimē valuī. Semper prosperā valētūdine sum ūsus. Hāctenus bonā valētūdine fuī, faustā, incolumī, fēlīcī, prosperā, secundā, integrā, basilicā, athlēticā, pancraticā(1) valētūdine.
Georgius
Faxint superī, ut isthuc sit perpetuum ac proprium. Laetus isthuc audiō. Voluptātem mihi nūntiās. Est isthuc mihi audītū perquam iūcundum. Sermōnem istum ex tē audīre suprā modum gaudeō. Isthuc haut invītus audiō. Oppidō(2) laetor, isthuc audīre ex tē. Ut idem semper faciās, optō. Ut ad istum modum quam diūtissimē valeās, optō. Tibi grātulor, mihi gaudeō. Grātia superīs. Grātiam habeō superīs.
Livinus
Equidem pulchrē valeō, sī tū valēs.
Georgius
Nihil interim molestiae fuit?
Livinus
Nihil, nisi quod vestrā cōnsuētūdine fruī nōn licuit.
Georgius
Quō pactō valēs?
Livinus
Rēctē, pulchrē, bellē, perbellē, bellissimē, perpulchrē, fēlīciter, commodē, minimē male. Valeō, ut volō potius, quam ut mereor,(3) basilicē, pancraticē, athlēticē.
Georgius
Exspectābam, ut dīcerēs etiam, tauricē.(4)
(1). Basilicē: id est rēgiē et magnificē seu splendidē. Solent sīquidem dīligentius cūrāre valētūdinem rēgēs. Pancraticē et Athlēticē: vide Colloquium Prīmum, notās 19-20.
(2). Oppidō: prō valdē, multum.
(3). Monet temporī ac necessitātī serviendum esse; quandō scīlicet nostra nōbīs parum placent et facultās dēest, nōn animus. Commodius enim per adversa dūcentem Deum sequimur patientiā, quam invītī trahimur.
(4). Tauricē: īnstār taurī.