Colloquia Familiaria - Lūsus Puerīlis
Dē Lūsū
Persōnae:
Nicolaus, Hieronymus, Cocles, Paedagogus
Nicolaus, Hieronymus, Cocles, Paedagogus
Nicolaus
Iamdudum et animus, et caelum, et diēs invītat ad lūdendum.
Hieronymus
Invītant quidem haec omnia, sed sōlus praeceptor nōn invītat.
Nicolaus
Subōrnandus ōrātor quispiam, quī veniam extorqueat.
Hieronymus
Aptē quidem dictum, extorqueat. Nam citius clāvam extorserīs ē manū Herculis, quam ab hōc lūdendī veniam. At ōlim illō nēmō fuit lūdendī āvidior.
Nicolaus
Vērum; sed iam ōlim ille oblītus est, sē fuisse puerum. Ad verbera facillimus est et līberālis: hīc parcissimus, idemque difficillimus.
Hieronymus
Attamen prōtrūdendus est aliquis lēgātus, nōn admodum verēcundae frontis, quem nōn illicō prōtelet suīs saevīs dictīs.
Nicolaus
Eat, quī volet: ego carēre malō, quam rogāre.
Hieronymus
Nēmō magis accommodus ad hanc lēgātiōnem, quam Coclēs.
Nicolaus
Nēmō profectō. Nam perfrīctae frontis est, ac bene linguāx. Deinde sēnsum hominis pulchrē callet.
Hieronymus
Ī, Coclēs, ab omnibus nōbīs māgnam initūrus grātiam.
Cocles
Equidem experiar sēdulō. Vērum sī nōn successerit, nē cōnferte culpam in ōrātōrem vestrum.
Hieronymus
Bene ōmināre: sī tē satis nōvimus, impetrābis. Abī ōrātor, redībis exōrātor.
Cocles
Eō. Bene fortūnet lēgātiōnem meam Mercurius. Salvē praeceptor.
Paedagogus
Quid sibi vult nūgāmentum hominis?
Cocles
Salvē praeceptor observande.
Paedagogus
Īnsidiōsa cīvilitās. Satis iam salveō. Dīc, quid velīs.
Cocles
Tōtus discipulōrum tuōrum grex ōrat lūdendī veniam.
Paedagogus
Nihil aliud quam lūditīs, etiam absque veniā.
Cocles
Scit tua prūdentia, vigōrem ingeniōrum excitārī moderātō lūsū, quemadmodum nōs docuistī ex Quīntiliānō.
Paedagogus
Sānē ut isthuc tenēs, quod prō tē facit. Laxāmentō opus est iīs, quī vehementer labōrant: vōbīs, quī sēgniter studētis, et ācriter lūditīs, fraenō magis opus est, quam laxātīs habēnīs.
Cocles
Adnītimur prō vīribus. Et sī quid hāctenus cessātum est, post dīligentiā sarciētur.
Paedagogus
Oh sartōrēs! Quis erit fidēiussor aut spōnsor, isthuc futūrum?
Cocles
Ego capitis meī perīculō nōn dubitem esse spōnsor.
Paedagogus
Immō culī perīculō potius. Sciō, quam nōn sit tūtum tibi crēdere; tamen hīc perīculum faciam, quam sīs bonae fideī. Sī dederīs verba, posthāc nēcquicquam mēcum ēgerīs. Lūdant, sed grēgātim in campīs. Nē dīvertant ad compōtātiōnēs, aut alia nequiōra. Mātūrē sē recipiant domum ante sōlis occubitum.
Cocles
Fiet. Exōrāvī, quanquam aegrē.
Hieronymus
Ō lepidum caput! omnēs amāmus tē plūrimum.
Cocles
Sed interim cavendum, nē quid peccēmus; alioquī dē āteō tergō dēpendendum foret. Fidēiussī vestrō omnium nōmine. Quod sī quid accidat, nōn est, quod mē posthāc ūtāminī lēgātō.
Hieronymus
Cavēbitur. Sed quod lūsūs genus potissimum placet?
Cocles
Dē hōc in campō cōnsultābimus.