Colloquia Familiaria - Colloquium Quīnquāgēsimum Prīmum
Echo
Persōnae:
Iuvenis, Echo
Iuvenis, Echo
Iuvenis
Cupiō paucīs tē cōnsulere, sī vacat.
Echo
Vacat.
Iuvenis
Et sī veniō tibi grātus iuvenis.
Echo
Venīs.
Iuvenis
Sed potesne mihi et dē futūrīs dīcere vērum, Ēchō?
Echo
Ἔχω(1).
Iuvenis
Et Graecē nōstī? Quid istūc novī?
Echo
Novī.
Iuvenis
Quālia tibi videntur Mūsārum studia?
Echo
Δία(2).
Iuvenis
Cēnsēs igitur terendōs auctōrēs, quī condūcunt ad bonās litterās?
Echo
Terās.
Iuvenis
Quam igitur mentem habent istī, quī haec studia linguīs trādūcunt suīs?
Echo
Suīs.
Iuvenis
Sed utinam hārum cultōrēs similiter essent et pietātis studiōsī!
Echo
Ō sī!
Iuvenis
Nunc quōrundam improbītās omnēs reddit invīsōs.
Echo
Ἴσως(3).
Iuvenis
Et multīs hominum peccātum cōnfertur in nōmen ērudītiōnis.
Echo
Ὄνοις(4).
Iuvenis
Atquī vulgō videntur nōn īnfimī.
Echo
Fimī.
Iuvenis
Quid facere cēnsēs eōs, quī terunt aetātem in sophisticō doctrīnae genere?
Echo
Nēre.
Iuvenis
Fortassis tēlās arāneārum?
Echo
Hārum.
Iuvenis
At Penelopēs tēlās texunt ac retexunt.
Echo
Texunt.
Iuvenis
Cui suādēs, ut mē dem vītae īnstitūtō?
Echo
Tūtō.
Iuvenis
Erit auspicātum, sī uxōrem dūxerō?
Echo
Sērō.
Iuvenis
Quid sī mihi veniat ūsū, quod hīs, quī incidunt in uxōrēs parum pudīcās, parumque frūgiferās?
Echo
Ferās.
Iuvenis
Atquī cum tālibus morte dūrior est vīta.
Echo
Vīta.
Iuvenis
Sīccine in rēbus hūmānīs domināri fortūnam.
Echo
Ūnam.
Iuvenis
Magis fortassis expedit, ut aliquis prae coniugiō monachī īnstitūtum ēligat.
Echo
Ligat.
Iuvenis
Quid superest remediī, ubī quem adstrīnxerit iam nōdus insolūbilis?
Echo
Bīlis.
Iuvenis
Attamen miserum est hominēs vīvere sōlōs.
Echo
Ὅλως(5).
Iuvenis
Cuiusmodī cēnsēs hōrum temporum plērōsque monachōs?
Echo
Ἄχος(6).
Iuvenis
Quid igitur istōs movet, quī suspiciunt illōs ut sēmideōs?
Echo
Δέος(7).
Iuvenis
Quid captant plērīque quī ambiunt sacerdōtium.
Echo
Ōtium.
Iuvenis
Praetereā nihil habet sacerdōs?
Echo
Κέρδος(8).
Iuvenis
Quid bonae reī contigit illīs, quī fīunt episcopī?
Echo
Κόποι(9).
Iuvenis
At nūllī magis vīvunt in ōtiō.
Echo
Sciō.
Iuvenis
Quae rēs illōs admonēre poterit, ut intellegant, quantum sustineant onus?
Echo
Ὁ νοῦς(10).
Iuvenis
Ergō rēs praeclāra est sacerdōtium, sī quis sē in eō gerendō quālem oportet praebeat?
Echo
Beat.
Iuvenis
Quid frūctūs erit, sī mē cōnferam in aulam eōrum, quī praecellunt monarchicā dignitāte.
Echo
Atē(11).
Iuvenis
At nōn paucōs videō, quī solent illinc sibi praeclāram fēlīcitātem ariolārī.
Echo
Λάροι(12).
Iuvenis
At interim dum incēdunt hōlōsērīcātī, vulgō videntur hominēs magnificī.
Echo
Fīcī.
Iuvenis
Forīs igitur aureōs, intus fīculneōs hominēs dīcis, sī quis inspiciat cominus?
Echo
Minus.
Iuvenis
Nihil igitur praeclārī sunt, quōs prō diīs venerāmur byssinōs?
Echo
Σίνος(13).
Iuvenis
Nec mīlitāre genus magnō aestimābis fortasse.
Echo
Asse.
Iuvenis
Magnum quiddam pollīcentur, quī ē sīderibus et futūra praedīcunt Astrōlogī.
Echo
Λόγοι(14).
Iuvenis
At strēnuē labōrant Grammaticī.
Echo
Εἰκῇ(15).
Iuvenis
Nōn placent, opīnor, lēgulēiī hominēs semper famēlicī.
Echo
Λύκοι(16).
Iuvenis
Quālis erō, sī fīam opifex.
Echo
Faex.
Iuvenis
Itane nihil praetereā adferunt artēs bonī aut malī?
Echo
Alī.
Iuvenis
Fuerōne beātus sī persevērāverō in bonīs litterīs?
Echo
Eris.
Iuvenis
Sed quae rēs dabit ut adsit pietās?
Echo
Aetās.
Iuvenis
Decem iam annōs aetātem trīvī in Cīcerōne.
Echo
Ὄνε(17).
Iuvenis
Unde tibi subit mē asinum dīcere?
Echo
Ē rē.
Iuvenis
Fortassis hoc dīcis, nōn sīc huic incumbendum ut aliōs relinquam?
Echo
Inquam.
Iuvenis
Nōn placet igitur is, quī sē per omnem vītam tantum in hoc torqueat, ut fīat Cīcerōniānus.
Echo
Ἄνους(18).
Iuvenis
Quid superest nātū grandibus, quōrum aetās ad haec discenda nōn est tempestīva?
Echo
Stīva.
Iuvenis
Facundior essēs, opīnor, sī longius abessem.
Echo
Essem.
Iuvenis
Nōn mē dēlectant sermōnēs dissyllabī.
Echo
Abī.
Iuvenis
Coepī prior; videō nōn posse vītārī, quīn posterior dēsinās.
Echo
Sinās.
Iuvenis
Iam igitur tibi videor satis īnstrūctus ad ea probē gerenda, quae sunt in vītā?
Echo
Ita.
Iuvenis
Proinde sī mē velīs abīre, dīcitō.
Echo
Itō.
Footnotes
(1). Id est, possum.
(2). Id est, sacra.
(3). Id est, scilicet.
(4). Id est, asinīs.
(5). Id est, omninō.
(6). Id est, dolōrem.
(7). Id est, timor.
(8). Id est, lucrum.
(9). Id est, labōrēs.
(10). Id est, mēns.
(11). Atē, id est. Vidē Chīliadēs.
(12). Id est, stupidī. Vidē Chīliadēs.
(13). Id est, noxa.
(14). Id est, fābulae.
(15). Id est, frūstrā.
(16). Id est, lupī.
(17). Id est, asine.
(18). Id est, āmēns.