Colloquia Familiaria - Colloquium Vīcēsimum Tertium
Dē Scrībendō
Persōnae:
Cornelius, Andreās
Cornelius, Andreās
Cornelius
Scītē tū quidem pingis, sed charta tua perfluit. Charta subhumida est, ac trānsmittit ātrāmentum.
Andreās
Quaesō, ut apparēs mihi pennam hanc.
Cornelius
Dēest mihi gladiolus scrīptōrius.
Andreās
Ēn tibi.
Cornelius
Huī, quam obtūsus!
Andreās
Accipe cōticulam.
Cornelius
Utrum amās scrībere cuspide dūriusculā, an molliōre?
Andreās
Attemperā ad manum tuam.
Cornelius
Ego molliōre soleō.
Andreās
Quaesō, ut mihi dēscrībās ōrdine figūrās elementōrum.
Cornelius
Graecās an Latīnās?
Andreās
Latīnās prīmum cōnābor imitārī.
Cornelius
Suppedita chartam.
Andreās
Accipe.
Cornelius
Sed meum ātrāmentum dīlūtius est, subinde īnfūsā aquā.
Andreās
At meum līnteolum prōrsus exāruit.
Cornelius
Imminge; nisi māvīs immeiere.
Andreās
Immō potius rogābō alicunde.
Cornelius
Praestat habēre domī, quam rogāre commodātō.
Andreās
Quid est scholasticus absque calamō et ātrāmentō?
Cornelius
Quod mīles absque clypeō et gladiō.
Andreās
Utinam mihi essent articulī tam celerēs. Equidem nōn possum dictantis vōcem scrībendō assequī.
Cornelius
Prīma cūra sit, ut bene scrībās: proxima, ut celeriter. Sat citō, sī sat bene.
Andreās
Bellē: sed istam cantiōnem cane praeceptōrī, cum dictat, Sat citō, sī sat bene.