Colloquia Familiaria - Colloquium Vīcēsimum Tertium
Dē Scrībendō
Persōnae:
Cornelius, Andreas
Cornelius, Andreas
Cornelius
Scītē tū quidem pingis, sed charta tua perfluit. Charta subhumida est, ac trānsmittit ātrāmentum.
Andreas
Quaesō, ut apparēs mihi pennam hanc.
Cornelius
Dēest mihi gladiolus scrīptōrius.
Andreas
Ēn tibi.
Cornelius
Huī, quam obtūsus!
Andreas
Accipe cōticulam.
Cornelius
Utrum amās scrībere cuspide dūriusculā, an molliōre?
Andreas
Attemperā ad manum tuam.
Cornelius
Ego molliōre soleō.
Andreas
Quaesō, ut mihi dēscrībās ōrdine figūrās elementōrum.
Cornelius
Graecās an latīnās?
Andreas
Latīnās prīmum cōnābor imitārī.
Cornelius
Suppedita chartam.
Andreas
Accipe.
Cornelius
Sed meum ātrāmentum dīlūtius est, subinde īnfūsā aquā.
Andreas
At meum līnteolum prōrsus exāruit.
Cornelius
Imminge; nisi māvīs immeiere.
Andreas
Immō potius rogābō alicunde.
Cornelius
Praestat habēre domī, quam rogāre commodātō.
Andreas
Quid est scholasticus absque calamō et ātrāmentō?
Cornelius
Quod mīles absque clypeō et gladiō.
Andreas
Utinam mihi essent articulī tam celerēs. Equidem nōn possum dictantis vōcem scrībendō assequī.
Cornelius
Prīma cūra sit, ut bene scrībās: proxima, ut celeriter. Sat citō, sī sat bene.
Andreas
Bellē: sed istam cantiōnem cane praeceptōrī, cum dictat, Sat citō, sī sat bene.