Colloquia Familiaria - Colloquium Quadrāgēsimum Nōnum
Ἀπροσδίονυσα, sīve absurda
Persōnae:
Annius, Leucius
Annius, Leucius
Annius
Audiō tē interfuisse nuptiīs Pancrātiī et Albīnae.
Leucius
Numquam antehāc īnfēlīcius nāvigāvī, quam hoc tempore.
Annius
Quid ais? tantam fuisse hominum frequentiam?
Leucius
Nec umquam mihi vīlior fuit vīta, quam id temporis.
Annius
Vidē quid faciant opēs. Ad meās nuptiās paucī convenīrent, idque tenuēs.
Leucius
Vix fuerāmus ingressī pelagus, ortus est ingēns turbō.
Annius
Narrās deōrum coetum. Tōtne aderant virī prīncipēs, tot mātrōnae nōbilēs?
Leucius
Boreās dissecuit vēlum, dissectumque dissipāvit.
Annius
Dēspōnsam nōvī. Nihil fingī potest venustius.
Leucius
Mox flūctus revulsit clāvum.
Annius
Idem vidētur omnibus. Nec spōnsus admodum illī cēdit, ut aiunt, fōrmae grātiā.
Leucius
Quid animī cēnsēs nōbīs illīc fuisse?
Annius
Sānē rārum nunc est virginēs nūbere.
Leucius
Rēmigandum nōbīs erat.
Annius
Dōtem vix crēdibilem narrās.
Leucius
Ecce mox aliud malum.
Annius
Cūr puellam nūbilem commīsērunt tam ferōcī?
Leucius
Appāruit pīrātārum nāvis.
Annius
Profectō sīc est: in multīs nēquitia supplet aetātem.
Leucius
Ibi nōbīs geminum fuit bellum, alterum cum marī, alterum cum praedōnibus.
Annius
Huī tantum dōnāriōrum? Interim pauperibus nēmō dat fēstūcam.
Leucius
Quid? cēderēmus? Imō dēspērātiō vītae addēbat animōs.
Annius
Vereor nē sint sterilēs nuptiae, sī vēra praedicās.
Leucius
Imō iniēcimus harpagōnēs.
Annius
Ō rem novam! ante nuptiās gravida?
Leucius
Sī spectāssēs eum cōnflīctum, fatērēris, mē nōn esse fōeminam.
Annius
Ut audiō, coniugium hoc nōn sōlum rātum est, sed etiam cōnsummātum.
Leucius
Īnsiluimus in nāvim pīrāticam.
Annius
At dēmīror, tē vocātum aliēnum, mē praeteritō, quī tertiō propinquitātis gradū spōnsae patrem contingō.
Leucius
Ipsōs in mare praecipitēs dedimus.
Annius
Vēra praedicās; īnfēlīcium nūllī sunt affīnēs.
Leucius
Quidquid erat praeda, inter nōs partītī sumus.
Annius
Expostulābō cum puellā prīmō quoque tempore.
Leucius
Mox exorta est subita trānquillitās: dīxissēs esse Alcēdonia(1).
Annius
Sī illī rēs est, mihi est animus. Nihil moror illius benevolentiam.
Leucius
Ita prō ūnā duās nāvēs in portum dēdūximus.
Annius
Indignētur, quī alit.
Leucius
Quō eam rogās? In templum, vēlī partem dicātūrus dīvō Nīcolāō.
Annius
Hodiē nōn est līberum mihi: nam ipse domī convīvās exspectō; aliās nōn excūsābō.
Footnotes
(1). Alcēdonia: Diēs serēnī quibus mare trānquillum et pācātum est.