Colloquia Scholastica - Liber Tertius - Colloquium Unum et Vicesimum
Persōnae:
Lacētus, Hypodidascalus
Lacētus, Hypodidascalus
Lacētus
Praeceptor, licetne mihi prōdīre?
Hypodidascalus
Quae tibi est prōdeundī causā?
Lacētus
Est mihi eundum ad forum.
Hypodidascalus
Quid eō?
Lacētus
Ut emam corium.
Hypodidascalus
In quem ūsum?
Lacētus
Ad calceōrum soleās.
Hypodidascalus
Quis tē adiuvābit in ēmptiōne?
Lacētus
Quīdam oppidānus, cui hoc mandāvit pater meus.
Hypodidascalus
Dēbuerās adīre mē cum caeterīs, quī ad forum prōdiērunt.
Lacētus
Occupātus eram.
Hypodidascalus
Quā in rē?
Lacētus
In scrībendīs ad patrem līterīs.
Hypodidascalus
Quandō eās dabis?
Lacētus
Hodiē, sī quem in forō offenderō.
Hypodidascalus
Abī; et meminerīs ad hōram sextam adesse.
Lacētus
Meminerō.