Colloquia Scholastica - Liber Tertius - Colloquium Quintum

Praeceptor, quid reddēmus crās manē?

Hodiē manē palam dīxī ante ē scholā missiōnem.

At ego nōn aderam, praeceptor.

Roga condiscipulōs. Nam sī vellent singulī mē interrogāre dē rēbus ā mē palam dictīs, quaesō, quandō fīnis esset? Itaque fac sīs posthāc prūdentior.

Cūrābō prō vīribus.

Sed tū ubi erās?

Prōdieram.

Quid prōdierās?

Ut cūrārem negōtium aliquod, dē quō pater ad mē scrīpserat.

Ā quō petīvistī veniam?

Ab hypodidascalō.

Cūr nōn ā mē potius?

Quia erās occupātus.

Quid agēbam?

Alloquēbāris in āreā quōsdam virōs honōrātōs, quī tē conventum vēnerant.

Abī, nunc recordor.