Colloquia Scholastica - Liber Tertius - Colloquium Duodetricesimum

Hodiē igitur Petrum convēnistī?

Hodiē.

Ubī?

In templō.

Quotā hōrā?

Octāvā mātūtīnā.

Nunquid rogāstī quandō sit reditūrus scholam?

Rogāvī.

Quid ille?

Nesciō, inquit.

Dēbuistī illum ad reditum exhortārī.

Id ego fēcī, et multīs quidem verbīs.

Bene fēcistī, sed quid ille respondit?

Sē adhūc ā patre dētinērī ad frūctūs colligendōs.

Quid sī ad ipsum patrem scrībās dē statū nostrō scholasticō? Fortasse enim movēbitur, ut fīlium citius remittat.

Sī tibi ita vidētur, faciam, idque dīligenter.

Fac igitur prīmō quōque tempore; sed audī, scrībe plānissimē, deinde līterās tuās mihi ostende priusquam dēs perferendās.

Sēdulō faciam, praeceptor.