Colloquia Scholastica - Liber Secundus - Colloquium Unum et Quadragesimum

Unde venīs?

Domō.

Quid agitur domī vestrae?

Nihil tua refert.

Fateor; sed familiārēs sīc rogāre ferē solēmus, perinde quasi rogēmus, ‘Ut valētis? Quōmodo sē vestrae rēs habent?’

Dē rē aliēnā nimium percontārī nōn decet.

Taceō: sed vidēris mihi prō aetāte nimis sapere.

Nihil meum dīcō; id audīvī saepe.

Ego quoque nōn semel audīvī.

Cūr ergō nōn ūteris?

Quia nōn semper in mentem venit.

Īmō quia tū es percontātor; quae rēs nōn sine causā datur vitiō.

Habeō grātiam, quod mē adeō amīcē moneās: posthāc, adiuvante Deō, cavēbō ineptus esse.

Ita paulātim sapiēs.