Colloquia Scholastica - Liber Secundus - Colloquium Sexagesimum

Hodiē māne quotā hōrā expergēfactus es?

Ante lūcem; quotā hōrā nesciō.

Quis tē expergēfēcit?

Vēnit excitātor hebdomadārius cum lāternā suā, pulsāvit ācriter ōstium cubiculī; quīdam aperuit; excitātor accendit nostram lucernam; clārā vōce inclāmāvit, Experrēctī sunt omnēs.

Nārrā mihi ōrdine quid ēgeris ex illō tempore usque ad fīnītum ientāculum. Vōs puerī, auribus atque animīs dīligenter attendite, ut discātis hunc vestrum condiscipulum imitārī.

Experrēctus sum, surrēxī ē lectō, induī tunicam cum thōrāce, sēdī in scabellō, accēpī femorālia et tībiālia, utraque induī, calceōs calceāvī, femorālia ligulīs astrīnxī thōrācī, tībiālia periscelide ligāvī super crūra, cingulō mē praecīnxī, caput dīligenter pexuī, aptāvī capitī pileolum, togam induī; deinde ēgressus cubiculō dēscendī īnfrā, ūrīnam in āreā reddidī ad parietem, accēpī aquam frīgidam ē situlā, manūs et faciem lāvī, ōs et dentēs colluī, dētersī mantīlī manūs et faciem. Intereā signum ad precātiōnem datur minōre tintinnābulō, in aulam prīvātam convenītur, precāmur ūnā, accipimus ōrdine ientāculum ā famulō culīnāriō, ientāmus in trīclīniō sedentēs quiētī, sine murmure et strepitū; quōs audīvī ineptē garrientēs, aut verba loquentēs ōtiōsa, aut etiam lascīvientēs vīdī, amīcē admonuī: quī nōn pāruērunt admonitiōnī, dētulī ad observātōrem, ut eōs notāret.

Nēmōne vōbīs praeerat dum ientārētis?

Īmō hypodidascalus.

Quid agēbat intereā?

Ille per mediam aulam ambulābat tenēns librum in manibus, et identidem monēns observātōrem, ut notāret ineptē garrientēs.

Nūllumne igitur verbum tunc licet ēmittere?

Īmō licet; vērum iī dēmum notārī solent, quī diū et multīs verbīs ineptē et sine ūllō frūctū cōnfābulantur. Caeterum licet omnibus iūcundōs inter sē tractāre sermōnēs dē bonīs et honestīs rēbus, dum tamen id modestē fīat, citrā clāmōrem et contentiōnem.

Hāctenus satisfēcistī mihi; caetera nārrābis ā prandiō, nisi aliquod negōtium intervēnerit. Eāmus nunc in aulam ad prandium, nē magistrō in morā sīmus.

Audīvī modo signum darī.

Opportūnē datum.