Colloquia Scholastica - Liber Secundus - Colloquium Septimum

Persōnae:
Nōmenclātor, Puer

Nōmenclātor

Ubī est frāter tuus?

Puer

Modo īvit domum.

Nōmenclātor

Quid eō?

Puer

Petītum nōbīs opsōnium.

Nōmenclātor

Quid nunc opus est opsōniō?

Puer

In merendam.

Nōmenclātor

Annōn habētis in arcā vestrā?

Puer

Nōn.

Nōmenclātor

Quid ita nōn?

Puer

Quia māter nōn solet nōbīs dare opsōnium, nisi in praesēns tempus.

Nōmenclātor

Nempe quia nōvit vōs esse gulōsōs.

Puer

Quōmodo gulōsī sumus?

Nōmenclātor

Quia fortasse ūnō convictū dēvorātīs quod in trēs datum fuerit.

Puer

Tacē.

Nōmenclātor

Ego dīcam praeceptōrī, frātrem tuum nihil aliud quam discurrere.

Puer

Atquī prōdīre nōn solet, nisi cum bonā veniā praeceptōris.

Nōmenclātor

Atquī praeceptōrem fallit.

Puer

Quōmodo fallit eum?

Nōmenclātor

Nōn enim mēns est praeceptōris, ut ter quotīdiē prōdeat.

Puer

Sine illum venīre, vidēbis quid tibi respondeat.

Nōmenclātor

Īmō videat quid praeceptōrī respondeat.