Colloquia Scholastica - Liber Secundus - Colloquium Quinquagesimum Sextum

Quae sunt arborēs in hortō vestrō?

Hortum habēmus suburbānum, in quō sunt olera, quibus vēscimur quotīdiē; praetereā sunt in fundō nostrō bīnī hortī variīs arboribus cōnsitī.

In hortō quae sunt olera?

Dē hōc māter melius respondēre posset. Nam illīc saepe versātur aut serendī causā, aut sarriendī, aut aliquid colligendī.

Sed tamen dīc mihi aliquot olerum nōmina.

Parum prōdesset nōmina tibi recēnsēre, nisi rēs ipsās vidērēs: quīn eāmus in rem praesentem.

Potes īre quandō libet?

Possum quidem, mātre permittente.

Fac amābō permittat; sed eā lēge ut mē tibi comitem assūmās.

Id facillimē fīet; tantum hīc mē exspectēs: mox redierō.

Quid sī ea domī nōn est?

Tamen hoc tibi renūnciābō.

Bene vertat Deus.