Colloquia Scholastica - Liber Secundus - Colloquium Quinquagesimum Quintum

Quō nunc īs?

In hypocaustum.

Quid eō?

Hoccine rogandum est? nōn frīgus sentīs?

Quotusquisque nunc nōn sentiat, cum sit adeō acerbum? Sed ego mālim mē in culīnā calefacere.

Atquī praeceptor vetuit.

Nōn ignōrō: sed rogābō veniam.

Cūr nōn vīs in hypocaustō calefierī?

Vapōrēs clībanī tentant mihi caput, quod aliōquīn īnfirmum satis habeō; unde fit, ut facile ex capite labōrem.

Ego quoque sīc aliquandō fuī; sed paulātim assuēfēcī mē ad ferenda hypocaustī incommoda.

Et ego (ut spērō) mē assuēfaciam: vērum praestat id fierī hōrīs pōmerīdiānīs, ubi tantus aestus dēferbuerit.

Sed nunc tempus nōn est hīc philosophandī diūtius: iam mihi dentēs frīgore crepitant.