Colloquia Scholastica - Liber Secundus - Colloquium Quinquagesimum

Quot annōs habēs?

Tredecim, ut ā mātre accēpī: tū vērō?

Equidem nōn tot habeō.

Quot igitur?

Deest ūnus.

Sunt ergō duodecim.

In prōmptū est ratiō.

Sed frāter tuus quotum agit annum?

Quīntum.

Quid vīs? iam Latīnē loquitur.

Quid mīrāris? semper habēmus domī paedagōgum et doctum et dīligentem: is semper nōs Latīnē loquī docet; nihil Anglicum effert, nisi aliquid dēclārandī causā: quīn etiam patrem nōn audēmus nisi Latīnē alloquī.

Nunquam igitur Anglicē loquiminī?

Solum cum mātre, idque certā quādam hōrā, cum illa nōs ad sē vocārī iubet.

Quid agitis cum familiā?

Cum familiā rārus est nōbīs sermō, et quidem tantum in trānsitū; et tamen famulī ipsī nōs Latīnē alloquuntur.

Quid ancillae?

Sī quandō ūsus postulat ut eās alloquāmur, ūtimur sermōne vernāculō, ut solēmus cum ipsā mātre.

Ō vōs fēlīcēs, quī tam dīligenter docēminī!

Est Deō grātia, cuius dōnō patrem habēmus quī cūret nōs tam accūrātē ērudiendōs.

Certē eius reī laus et honor ūnicō coelestī Patrī dēbētur.

Sed quid agimus? iam audiō recitārī catalogōs.

Ergō festīnēmus.