Colloquia Scholastica - Liber Secundus - Colloquium Quadragesimum Tertium

Unde redīs?

Foris.

Cūr exierās?

Redditum ūrinam.

Quālis est coelī faciēs?

Nebulōsa.

An regelat?

Sīc resolvitur gelū, ut nivēs omnīnō liquēscant.

Etiamne pluit?

Sēnsī aliquid supernē distīllāre.

Fortasse in trānsitū, ē stillicidiō tēctī.

Īmō ē nūbibus, sciō; quod sī nōn crēdis, vidē tū ipse.

Quasi ego tibi nōn crēdam in rē tantillā.

Cūr igitur dubitāre vidēbāris?

Ut plūribus verbīs tēcum fābulārer.

Quōrsum id pertinet?

Ad Latīnum sermōnem exercendum.

Sed interim saepe ōtiōsa verba dīcimus; ā quibus omnīnō abstinendum Chrīstus praecēpit.

Tōtā errās viā in praeceptī intellēctū.

Cūr istud dīcis?

Quia ‘Nōn est ōtiōsus sermō, quī ad aliquam īnstitūtiōnem refertur’, praesertim ubi agitur dē bonīs et honestīs, quālia sunt Deī opera in rēbus nātūrālibus.

Vidēris mihi rēctē sentīre; proinde facile tibi assentior.

Sed haec hāctenus; īnstat nōbīs aliud negōtium.

Age, dēsināmus.