Colloquia Scholastica - Liber Secundus - Colloquium Quadragesimum Septimum

Persōnae:
Puteānus, Buerla

Puteānus

Unde veniēbās modo?

Buerla

Ē culīnā.

Puteānus

Quid illūc īverās?

Buerla

Ut mē calefacerem.

Puteānus

Tū, crēdō, libentius es in culīnā quam in scholā: nōnne?

Buerla

Nihil mīrum; in scholā nōn est ignis, sīcut in culīnā.

Puteānus

Abī, sapis.

Buerla

Utinam tam saperem in dīvīnīs rēbus quam in cūrā corporis.

Puteānus

Fac sapiās.

Buerla

Quōmodo?

Puteānus

Studiō, cūrā, labōre, et dīligentiā.

Buerla

Nōn parcō labōrī.

Puteānus

Rēctē facis; sed est tempus exspectandum, cuius prōgressū fīunt omnia: intereā precandus est Deus assiduē.

Buerla

Bene monēs; utinam ille studia nostra prōmoveat in glōriam suī nōminis.

Puteānus

Id faciet, sī pergāmus eum colere dīligenter.