Colloquia Scholastica - Liber Quartus - Colloquium Tertium

Cūr dīligenter audīre dēbēmus Ēvangelium?

Ut discāmus Deum colere ex voluntāte eius.

Nihil aliud respondēs?

Quid respondērem? Nihil enim sciō praetereā.

Nōnne etiam ut sōbriē et iūstē vīvāmus?

Dēclārā mihi illa duo adverbia, quaesō.

Sōbriē, id est, continentēs; iūstē, id est, in iūstitiā; nempe, ut suum cuique tribuāmus. Ita fit, ut sōbriē ad vītam cuiusque prīvātam pertineat; iūstē autem ad chāritātem, quam proximō dēbēmus.

Sed audī, mī Claudī; nōnne cultus Deī omnia illa complectitur?

Probe sentīs, Quīntīne: sed voluī experīrī, an respōnsiōnem tuam rēctē intelligerēs.

Bene fēcistī. Nam dē sincērō verbī dīvīnī intellēctū nihil nimis dīcī potest. Et dē hāc rē quidem tēcum plūribus verbīs libenter agerem: sed nōs hōra ipsa admonet, ut discēdāmus.