Colloquia Scholastica - Liber Prīmus - Colloquium Vicesimum Septimum
Persōnae:
Francus, Mārcus
Francus, Mārcus
Francus
Pennae istae, quās circumfers, suntne vēnālēs?
Mārcus
Etiam, sī sē ēmptor obtulerit.
Francus
Ostende: vah, quam sunt mollēs!
Mārcus
Tālēs dēcidērunt ex ālīs nostrōrum ānserum: sed tentā dīligenter; sunt aliae aliīs firmiōrēs.
Francus
Satis videō quālēs sint: quot vīs dare prō quadrante?
Mārcus
Tantum sex.
Francus
Quid ais? sex? māllem emere ā mercātōribus, quī Lutetiā et Lugdūnō hūc adferunt.
Mārcus
Quasi nesciam quantī vēndantur. Audīvī ex frātre, quī dat operam scrībae huius cīvitātis, sē ēmisse Lutetiae
singulīs assibus.
Francus
Aliter Lutetiae, aliter Genēvae vīvitur: sed nōn opus est tot verbīs, vīs dare duodecim?
Mārcus
Hui! duodecim? quasi ego fūrātus sim.
Francus
Istud nōn dīcō; sed vidē num tibi placet conditiō.
Mārcus
Vīs ūnō verbō dīcam?
Francus
Dīc, quaesō; satis iam garrītum est.
Mārcus
Dabō tibi novem, modo prōmiscuē dē meā manū accipiās.
Francus
Nūgās agis; ego sine dēlēctū nōllem accipere quīndecim. Valē: alibī inveniam satis.
Mārcus
Per mē licet. Heus! heus! redī.
Francus
Cūr mē revocās?
Mārcus
Accipe, sī vīs, octo; nec ā mē plūrēs exspectā.
Francus
Cēdō tōtum fasciculum, ut dēligam arbitrātū meō.
Mārcus
Tēne; dēlige ut volēs.
Francus
Vidē nunc, et, sī libet, numerā.
Mārcus
Sunt vīgintī quātuor: cōnstat numerus. Sed mīror tē nūllās accēpisse ex ālā extrēmā; sunt enim firmiōrēs.
Francus
Sciō; sed habent caulem breviōrem. Accipe pretium.
Mārcus
Bene vertat Deus utrīque nostrum.
Francus
Īdēm tēcum optō atque precor. Sed quandō adferēs meliōrēs pennās?
Mārcus
Nesciō an meliōrēs possim; sed, ut spērō, brevī plūrēs afferam, cum ad vōs domum proficīscar.
Francus
Suntne vōbīs multī ānserēs?
Mārcus
Trīgintā et amplius.
Francus
Papae! quantus grex ānserum! ubi pāscuntur?
Mārcus
Sciēs aliās, nōn licet mihi diūtius hīc morārī. Valē, Francē.
Francus
Cūrā ut valeās, Mārce.