Colloquia Scholastica - Liber Prīmus - Colloquium Vicesimum Quartum
Persōnae:
Paedagōgus, Abrāhāmus Puer
Paedagōgus, Abrāhāmus Puer
Paedagōgus
Heus, Abrāhāme.
Abrāhāmus Puer
Hem, praeceptor.
Paedagōgus
Pōne librōs; iam satis tōtō diē studuistī: parā tē, ut eāmus ambulātum.
Abrāhāmus Puer
Nōnne ā coenā praestāret?
Paedagōgus
Salūbrior est ante cibum exercitātiō corporis.
Abrāhāmus Puer
Meminī ex tē audīre.
Paedagōgus
Nārrā Sōcratis dictum in eam sententiam.
Abrāhāmus Puer
‘Cum Sōcratēs usque ad vesperam contentius ambulāret, interrogātus quārē id faceret, respondit, Sē, quō
melius coēnāret, obsōnāre famem ambulandō.’
Paedagōgus
Probe meministī: quis auctor?
Abrāhāmus Puer
Cicerō: sed quō prōdībimus, praeceptor?
Paedagōgus
Extrā urbem.
Abrāhamus Puer
Mūtābōne calceōs?
Paedagōgus
Mūtā, nē illōs novōs pulvere cōnspergās: sūme etiam umbellam, nē sōlis ārdor īnfuscet tibi faciem.
Abrāhamus Puer
Iam parātus adsum.
Paedagōgus
Nunc sānē prōdeāmus.
Abrāhāmus Puer
Vocābōne ex vīcīniā ūnum aut alterum comitem?
Paedagōgus
Rēctē admonēs; sīc enim iūcundior erit deambulātiō: nam per viam sermōnēs inter vōs cōnserētis, et in umbrā
collūdētis alicubi.
Abrāhāmus Puer
Sīc etiam excitābitur cibī appetentia.
Paedagōgus
Ego lentō gradū praecēdam; ubi nactus eris comitēs, vōs mē per portam Rīpāriam sequiminī.
Abrāhāmus Puer
Nōs igitur illīc exspectābis?
Paedagōgus
Certō.
Abrāhāmus Puer
Quid sī nūllōs invēnerō?
Paedagōgus
Nihilōminus sequēre mē: audīstīne?
Abrāhāmus Puer
Audīvī, praeceptor.