Colloquia Scholastica - Liber Prīmus - Colloquium Unum et Quinquagesimum
Persōnae:
Observātor, Capparonus
Observātor, Capparonus
Observātor
Unde venīs, Capparone?
Capparonus
Domō.
Observātor
Quid affers illinc?
Capparonus
Merendam.
Observātor
Quis tibi permīserat exīre?
Capparonus
Praeceptor ipse.
Observātor
Unde istud probābis?
Capparonus
Adeāmus illum ut cōnsulāmus.
Observātor
At vidē quid agās.
Capparonus
Hāc in rē nihil timeō.
Observātor
Adeōne sēcūrus es?
Capparonus
‘Quī vērum dīcit, nihil timēre dēbet.’
Observātor
Vēra quidem ista est sententia, sed quotusquisque nōn mentītur?
Capparonus
Certus sum mē nihil mentīrī nunc.
Observātor
Propemodum persuādēs mihi. Abī: crēdō tibi, quia in mendāciō nunquam tē dēprehendī.
Capparonus
Est Deō grātia: quem precor ut mē integrum et pūrum cūstōdiat.
Observātor
Utinam ex animō omnēs precārentur. Recipe nunc tē, ut edās merendam tuam.