Colloquia Scholastica - Liber Prīmus - Colloquium Unum et Quadragesimum
Persōnae:
Ezekiēl, Beātus
Ezekiēl, Beātus
Ezekiēl
Vīs ā mē magnam inīre grātiam?
Beātus
Nihil libentius fēcerim, sī quidem penes mē rēs ipsa est. Sed quid est in quō tibi commodāre possim?
Ezekiēl
Dā mihi mūtuō assēs decem.
Beātus
Nōn tantum nunc habeō, sed maiōrem partem.
Ezekiēl
Quantum? quaesō.
Beātus
Nesciō, nisi crumēnam īnspexerō: ecce tibi octo assēs cum sēmisse.
Ezekiēl
Solōs septem accipiō, nōn enim tē vacuāre prōrsus volō.
Beātus
Parum refert; tōtum, sī vīs, accipe.
Ezekiēl
Agō tibi grātiās: crēdō hoc pecūniae satis fore negōtiō meō, cum aliquantulā, quam ipse habeō.
Beātus
Ut libet.
Ezekiēl
Amō tē dē istā tam exprōmptā benignitāte.
Beātus
Sī quid aliud possim, nē parcās.
Ezekiēl
Reddam tōtum, Deō volente, cum prīmum pater ad mē mīserit.
Beātus
Nē sīs magnopere solicitus; nōndum est opus mihi.