Colloquia Scholastica - Liber Prīmus - Colloquium Tricesimum Quartum

Habēsne multōs librōs?

Nōn admodum.

Sed quōs habēs?

Rudīmenta Grammaticae, Colloquia Scholastica, Terentium, Epistolās Cicerōnis cum Gallicā interpretātiōne, Catōnem, Dictiōnārium, Testāmentum Anglicum, Psalmōs cum Catēchismō, praetereā librum chartāceum ad scrībendum dictāta praeceptōris. Tū vērō quōs habēs?

Omnēs habeō quōs ēnumerāstī, praeter Catōnem, Terentium, et Cicerōnis Epistolās. Cūr enim librōs habērem, quī nōn praeleguntur in classe nostrā?

At ego, dum sumus ōtiōsī, lēgō interdum illōs; ut semper aliquid addiscam nōvī, praesertim in linguā Latīnā, et honestīs mōribus.

Prūdenter facis, mī Languīne. Ō mē miserum, quī nunquam didicī quid sit studiōsum esse!

Disce igitur. ‘Praestat’ enim ‘sērō quam nunquam discere’.