Colloquia Scholastica - Liber Prīmus - Colloquium Tricesimum
Persōnae:
Pictonus, Ioshua
Pictonus, Ioshua
Pictonus
Habēsne duās aut trēs pennās?
Ioshua
Sunt mihi tantum duae.
Pictonus
Dā mihi ūnam commodātō.
Ioshua
Nōn faciam.
Pictonus
Cūr nōn?
Ioshua
Nē abūtāris.
Pictonus
Meminerīs: fortasse aliquandō mē frūstrā rogābis aliquid.
Ioshua
Atquī iubet Chrīstus malum bonō compēnsandum.
Pictonus
Nōndum istud didicī.
Ioshua
Tamen discās oportet, sī cupis esse Chrīstī discipulus.
Pictonus
Quid cupiō magis?
Ioshua
Disce igitur magistrum imitārī.
Pictonus
Discam prōgressū temporis.
Ioshua
Praestāret nunc incipere, dum per tempus licet.
Pictonus
Nimis urgēs: nōndum complēvī annum octāvum, ut ait māter.
Ioshua
Semper est bene agendī tempus; sed interim nē mihi, quaesō, succēnseās: iocābar enim, ut tē ad colloquendum
invītārem tantisper dum sumus ōtiōsī. Ecce tibi penna, eaque nōn omnīnō pessima.
Pictonus
Reddam tibi statim, cum aliquid dēscrīpserō.
Ioshua
Nōlō mihi reddās.
Pictonus
Quid igitur faciam?
Ioshua
Quicquid volēs: ā mē enim tibi dōnō datur.
Pictonus
Grātiam habeō maximam.