Colloquia Scholastica - Liber Prīmus - Colloquium Septimum
Persōnae:
Cholētus, Colloguērius
Cholētus, Colloguērius
Cholētus
Unde redīs?
Colloguērius
Foris.
Cholētus
Cūr prōdierās?
Colloguērius
Ut īrem domum.
Cholētus
Quid eō?
Colloguērius
Petītum librōs meōs.
Cholētus
Eho! cūr nōn attulerās?
Colloguērius
Oblītus eram.
Cholētus
Siccīne solēs ientāculum aut merendam oblīvīscī?
Colloguērius
Rārissimē.
Cholētus
Profectō magna fuit negligentia.
Colloguērius
Īmō maxima: sed quid agās? puerī sumus.
Cholētus
Quid sī praeceptor tuum factum scīret?
Colloguērius
Fortasse poenās darem.
Cholētus
Ain’ tū fortasse? proculdubiō vāpulārēs. Nōn tē pudet sine librīs in Scholam venīre?
Colloguērius
Nōn sōlum pudet, sed piget etiam: veruntamen nē mē accūsēs, obsecrō.
Cholētus
Nihil minus cōgitō; sed nōn possum dissimulāre, quīn ego tē reprehendam.
Colloguērius
Istud (crēdō equidem) amīcē facis: itaque bonī cōnsulō.
Cholētus
Id satis est mihi: eāmus intrō in audītōrium.
Colloguērius
Tempus est: iam decuriōnēs exigunt scrīptūrae ratiōnem.