Colloquia Scholastica - Liber Prīmus - Colloquium Quinquagesimum Quintum
Persōnae:
Sulpitius, Munchius
Sulpitius, Munchius
Sulpitius
Impetrāstis lūdendī facultātem?
Munchius
Impetrāvimus.
Sulpitius
Ad quod usque tempus?
Munchius
Ad coenam usque.
Sulpitius
Quī dedērunt versūs?
Munchius
Prīmī et secundī.
Sulpitius
Quid caeterae classēs?
Munchius
Prīmus quisque decuriō trium proximārum classium prōnūnciāvit ūnam ē Sacrīs līterīs sententiam.
Sulpitius
Nōnne precātī estis, ut solēmus?
Munchius
Precātī, et quidem praesente lūdīmagistrō: tū vērō ubi erās?
Sulpitius
Īveram domum, ā mātre accersītus.
Munchius
Nunc igitur quid agere cōgitās?
Sulpitius
Lūdēre sēsquihōram; deinde ad studium mē recipere.
Munchius
Vīn’ tū ut tibi sim collūsor?
Sulpitius
Quidnī velim?
Munchius
Quō lūsū nōs exercēbimus?
Sulpitius
Nūllus est mihi iūcundior pilā palmāriā.
Munchius
Nec mihi quidem.
Sulpitius
Vīsāmus igitur, an caeterī partēs sortītī sint: nam sī sōlī lūderēmus, minus esset voluptātis.
Munchius
Vīsāmus sānē.