Colloquia Scholastica - Liber Prīmus - Colloquium Octavum
Persōnae:
Puer, Paedagōgus
Puer, Paedagōgus
Puer
Praeceptor, licetne pauca?
Paedagōgus
Loquēre audācter.
Puer
Ego et condiscipulī meī hōc ferē tōtō trīduō librīs affīxī fuimus, licetne paulisper animum lūdō relaxāre?
Paedagōgus
Dīc igitur aliquam sententiam.
Puer
‘Interpōne tuīs interdum gaudia cūrīs,’ ‘Ut possīs animō quemvīs sufferre labōrem.’
Paedagōgus
Dīc etiam versūs Anglicōs, sī memoriā tenēs.
Puer
‘Mirth with thy labour sometimes put in use, ’ ‘ That thou thy labour better mayst endure.’
Paedagōgus
Quam rēctē dīxistī omnia!
Puer
Est Deō grātia.
Paedagōgus
Addendum posthāc erit aliquid.
Puer
Quidnam, praeceptor?
Paedagōgus
Quī dedit mihi ingenium et mentem bonam.
Puer
Sed quis mē illa docēbit verba?
Paedagōgus
Ea scrībam tibi in commentāriolō tuō, ut ēdiscās. Sed dīc mihi, quaesō, quis tē docuit istam ōrātiōnem quam
prōnūnciāstī?
Puer
Campānus heri dederat mihi scrīptam, et ego memoriae mandāvī.
Paedagōgus
Profectō ego tē amō, mī Daniēl, ob istam dīligentiam.
Puer
Agō tibi grātiās, praeceptor. Permittisne igitur ut lūdāmus?
Paedagōgus
Sānē. Abī, renūnciā condiscipulīs tuīs.
Puer
Faciam.
Paedagōgus
Quid dīcēs illīs?
Puer
Id quod mē docuistī aliquandō.
Paedagōgus
Sed volō prius ex tē audīre.
Puer
‘Gaudēte, puerī; ēn, afferō vōbīs iūcundum nūncium: Ego vōbīs impetrāvī lūdendī potestātem.’
Paedagōgus
Eugē, probē meministī. Ītō nunc iam.