Dialogi Sacri - Dialogus Tricesimus Tertius
Samsōn. Iūd. 15.
Samsōn vīnctus, ad Palestīnōs dēductus, abruptīs vinculīs occīdit māxillā asinī mīlle virōs.
Persōnae:
Iūdaeī, Samsōn, Palaestīnī
Iūdaeī, Samsōn, Palaestīnī
Iūdaeī
An nescīs Palestīnōs habēre imperium in nōs?
Samsōn
Sciō.
Iūdaeī
Cūr ergō incendistī segetēs eōrum magnō nostrō mālō?
Samsōn
Pār parī retulī.
Iūdaeī
Atquī hūc vēnimus ut tē vīnctum dēdāmus eīs.
Samsōn
Siquidem iūreiūrandō cōnfirmātis vōs nōn illātūrōs mihi manūs violentās, vinciātis licet.
Iūdaeī
Fidem damus.
Samsōn
Agite, colligāte, dūcite, abdūcite quantum potestis.
Palaestīnī
Eugē, addūcitur ille hostis noster capitālis, quī immīsit scelerātās facēs in segetēs nostrās, nunc nunc
ulcīscēmur. Nunquam hodiē effugiēs, Samsōn. Hic tibi fīnis adest vītae.
Samsōn
Agite vērō, sī quid animī habētis, aggrediminī vīnctum. Experiar tamen sī quid habeō solitārum vīrium. Eugē.
Palaestīnī
Periimus, abrūpit vincula. Sed invādāmus undique; nōn ēvādet, praestēmus nōs virōs.
Samsōn
Sed unde mihi tēlum? Ecce autem commodum sēsē offert haec māxilla asinī; haec praebēbit vicem clāvae.
Pugnāte, virī, prō virīlī, sentiētis quī vir sim. Hem tibi quī prīmus mē lacessis, prīmus perītō. Et vōs quī
tam dēnsē conglobātī estis sentīte quae sint vīrēs Samsōnis, quī vincit inermis armātōs. Heus, cōgitātis
pugnāre pedibus? Quō fugitis? Hic adest hostis, nē prōdite victōriam. Tū quidem hīc iacēbis, tū quoque
adiungeris eī comes: dormīte. Eugē, Samsōn, quantam caedem fēcistī! Māxilla asinī quantam strāgem ēdidī!
Māxilla asinī prōstrāvī mīlle virōs.
Sententia
Quī Deī spīritū praeditus est, invictus est, frūstrāque cōnstringitur. Deus saepe vīlissimīs tēlīs ulcīscitur hostēs suōs.
Quī Deī spīritū praeditus est, invictus est, frūstrāque cōnstringitur. Deus saepe vīlissimīs tēlīs ulcīscitur hostēs suōs.
Castaliō, Sebastiānus. Dialogōrum Sacrōrum Librī Quātuor. Autōre Sebastiānō Castaliōne, quī nunc postrēmō
opus recognōvit: Argūmenta singulīs dialogīs praeposuit et sententiās subiēcit ex quibus puerī discant
officium, hoc est, quid imitandum sit, aut dēclīnandum. Ed. Thōmās Marsh. Londīnī. Thōmās Marsh. 1577.